Flora Raetica – ün proget dal tschientiner
Il Chantun Grischun ha seguond sia quantità da spazis da viver – limità tras clima, topografia, geologia e tips da l’ütilisaziun – üna fich gronda diversità da spezias da plantas. A reguard la derasaziun da la diversità daja amo bleras dumondas avertas causa chi dà differents lös e diversas valladas chi sun gnits tuts suot ögl fin al di d’hoz be per part.
Pel chantun exista ultra da quai ün s-chazi enorm d’indicaziuns da scuvertas istoricas, chi sun adattadas per ün congual cul inventar actual da las spezias da plantas per pudair deviar müdamaints da la flora per nos chantun. La ‘Flora von Graubünden’ fich precisa da Josias Braun-Blanquet e d’Eduard Rübel spordscha per quist lavur üna basa extraordinaria.
S-chaffir ün standard scientific per conguals e per muossar müdamaints
Pel giubileum da 100 ons da la «Flora von Graubünden» chi ha lö dal 2032 perseguitaina perquai cul proget ‘Flora Raetica’ d’inventarisar il stadi acutal da la flora i’l perimeter dal chantun sco eir da digitatlisar indicaziuns istoricas importantas dal stadi anteriur. Cun quai vain s-chaffi üna basa per conguals tanter i’l passà sco eir i’l avegnir. Impustüt vegnan perseguitadas las seguaintas dumondas:
- Chenünas spezias sun hozindi raras, chenünas numerusas?
- Chenünas spezias s’han diminuidas o sun svanidas daspö il 1932, chenünas s’han derasadas plü ferm obain sun gnüdas nanpro?
- Chenünas spezias creschan hozindi in lös plü ots co avant 100 ons?
Datas da basa per metter a dispusiziun per la protecziun da la natüra
Quistas datas sun particularmaing basas importantas per la protecziun da la natüra ; scha no cugnuoschain co cha spezias periclitadas obain problematicas as derasan, pon gnir missas in funcziun masüras decisivas a favur da la biodiversità.
Fascinar per la botanica
Ün böt important da FloRae es però eir d’avicinar la populaziun vzond la bellezza e la multifarità dal muond da las plantas e da tilla sensibilisar a favur da la lur protecziun. Implü laina fascinar laics interessats da differents nivels per la botanica e tils motivar da tour part ad ün dals progets da Citizen-Science.
Perioda fin 2032
La dombraziun da l’existenza da las spezias da plantas actualas vain realisada i’ls ons 2022 fin 2027 cun persunas in plaiv d’onur. L’analisa da las datas da vegetaziun istoricas e d’hoz vain manà tras d’ün team d’experts i’ls ons 2022 fin 2032. I vain communichà regularmaing sur dals resultats e da las conclusiuns interessants. La publicaziun d’ün cudesch a reguard la derasaziun e la dinamica da las plantas vascularas dal Grischun es planisà pel 2032.
